[Walther]

D’gosch usgwäscha


I hao mr d’gosch usgwäscha, liabs,
gsait hao i schlemms, bais on triabs.
jetz däd i’s gera wiedr vrschdaua,
i keht mr d‘aora selbr vrhaua

Diweil i so bleed bee: en meim hirn
då dennt sich d‘windunga schao mål vrwirrn,
i schwätz an scheiß on dees isch lätz,
mo i de liab han di doch räachd schätz.

Bee hald an driebl on edda so schlau,
sunschd däd i’s ed do, wois i’s doch genau
dass i de räachd gern uff d’händ wed draga!
komm sei mr guad on du d‘diera ed schlaga!

Ach gang wiedr her, mei feeschdr ischd offa,
noi, i bee nichdern, gwiaß ed bsoffa,
jå, i moinz ernschd, es gåhd mr oms läba.
i lieg uff dr nås! keedsch jetz ed vrgäba?