Winterräge
 

Im Garte lyt es schyttrs Ggartong-Chischtli
wi vrlore-n-abr s‘isch vo mir;
s‘isch nass und ganz vrschmiirt mit Vogumischt, i
gseh‘s dört ligge, dänke, s‘tröÿm vo dir.

Es mahnt my a-n-es nümm bruuchts Vogunäschtli,
wo im Schturm isch obenabe cho.
I luëge-n-ufe zu de lääre-n-Escht, mi
dünkt‘s, es flüg e Vogu grad drvo.

Är flügt zu dir und überbringt es Grüessli,
redt vo däm, wo-n-ig bi gsi für di,
är pfyft, mir syg z‘dradänke-n-e kes Müëssy,
schön isch s'Wättr dört im Meÿ no gsi!