Männerasyl
 

Männerasyl

Am Wasserhäusje an de Eck,
da stehn se rum, des is ihr Fleck,
an dem se sinn, wie se halt sinn,
da komme se in Schare hin,

die ale wie die junge Babbas!
Des Ecksche an de Brigg, des hat was
da gibt es Woscht, da gibt´s aach Bier
un Wasserlasse kann mer hier!

Gleisch hinne an dem Zeidungsstand,
mir sinn ja hier im Männerland!
De F(l)achmann schläscht da´s Wasser ab,
am Kiosk sin die Weiber knabb.

Un täschlisch im Zentralorgan
spricht Bild des Herz vom Babba an!
Hier kann de Babba sisch erfroin,
hier isser Mensch, hier deffer´s soin!