Jawennnôdeesganzeglômbdodrdeiflholadäd!

[Stimme der Zeit]

Jawennnôdeesganzeglômbdodrdeiflholadäd!


Uf de alde deidsche Gleise, wolld a neies Merkle reise.
Gohd zom Wähler, lupft d'Perigg: "Breng eich 's Wirdschaftswondr zrigg!"
Greizle, Greizle, Greizle nâ!
Greizle, Greizle, Greizle nâ!
Gohd zom Wähler, lupft d'Perigg: "Breng eich 's Wirdschafdswondr zrigg!"

Mr ka nô so lang schdudiera, des hoißd lang nô ned kapiera!
Woiß bloß, wie mr schleima duad: "Kabinettle, send so guad."
Greizle, Greizle, Greizle nâ!
Greizle, Greizle, Greizle nâ!
Woiß bloß, wie mr schleima duad: "Kabinettle, send so guad."

Mir hens gmerkelt, die hod glôga, do hen sich die Balka bôga.
Heidanei, hod d'Schell a Gosch, grad so wie a Breidmaulfrosch.
Greizle, Greizle, Greizle nâ.
Greizle, Greizle, Greizle nâ.
Heidanei, hod d'Schell a Gosch, grad so wie a Breidmaulfrosch.

Griecha, Ira, Idaliener; Euro, du wirsch ällweil scheener!
Merkel zoigd ons, wie mr pennd, ond nô schier em Krois rom rennd.
Greizle, Greizle, Greizle nâ?
Greizle, Greizle, Greizle nâ?
Merkel zoigd ons, wie mr pennd, ond nô schier em Krois rom rennd.

Romzuas, nomzuas, ruff ond rondr; haud ned nâ, des isch koi Wondr.
Bebbd’r ‘s Maul zua, nemmad Leim: Heidabimbam, Weib, gang hoim!
Greizle, Greizle, Greizle – noi.
Greizle, Greizle, Greizle – noi.
Bebbd’r ‘s Maul zua, nemmad Leim: Heidabimbam, Weib, gang hoim!

Hemmlherrgoddsdunndrladdich, Saggzemend ond Godd verdammich!
Bended ons, als wär nix drâ, d’Schulda an dr Hendra nâ!
Greizle, Greizle, Greizle – noi!
Greizle, Greizle, Greizle – noi!
Bended ons, als wär nix drâ, d’Schulda an dr Hendra nâ!

(Nach dem schwäbischen Volkslied: Uf dr schwäbsche Eisebahne)
ht tp://w w w.robert-joerg.de/Schwabisches/Lieder/Auf_dr__Schwabsche_Eisebahne/auf_dr__schwabsche_eisebahne.html
----------------------------------------------------------

(Liabr Walther, etzatle han i's amole vrsucht. Was moinsch? )